NEWSNOW| – පොසොන් පුර පසළොස්වක පොහොය වෙනුවෙන් දිවයින පුරා දන්සල් දහඅටදහස් දෙසියහතක් (18207) ප්‍රාදේශීය සෞඛ්‍ය වෛද්‍ය නිලධාරි කාර්යාලවල ලියාපදිංචි කර ඇති බව මහජන සෞඛ්‍ය පරීක්ෂකවරුන් පවසයි.
මේ අනුව මහජන සෞඛ්‍ය පරීක්ෂකවරුන් විසින් මෙම දන්සල් පරීක්ෂාවට ලක්කෙරෙන බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පැවසීය.
බීම වර්ග සහ අයිස්ක්‍රීම් දන්සල් නවදහස් හාරසිය විසිපහක් (9425) සහ බත් දන්සල් ඇතුළු වෙනත් ආහාර දන්සල් අටදහස් හත්සිය අසූ දෙකක් (8782) ක් මෙම දන්සල් අතර ඇත.
නිසි ලෙස ආහාර ගබඩා කර නොතිබීම, සෞඛ්‍ය ආරක්ෂිතව ආහාර පිළියෙළ කිරිම සහ පිළිගැන්වීම නොකිරීම වැනි කරුණු සම්බන්ධව මහජන සෞඛ්‍ය පරීක්ෂකවරු අවධානයෙන් පසුවන බව ද මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පැවැසීය.
දන්සල් ලබාදීමෙන් පසුව එම ස්ථානවලින් කුණු කසළ නිසි ලෙස බැහැර නොකළහොත් නීතිමය පියවර ගැනීමට හැකියාව ඇති බවද සෞඛ්‍ය අමාත්‍යාංශය අවධාරණය කරයි.
එසේම දන්සල්වලින් එකතුවන කසළ ප්‍රදේශයේ පළාත් පාලන ආයතනයට ලබාදීම සිදු කිරීමට කටයුතු කළ යුතුයි.